Դոֆինը նաիրական

                                   Ղարաբաղի Ազգային խորհրդի նախագահ
                           Արթուր Մկրտչյանի հիշատակին`
                           Սպանված Ստեփանակերտում 1992 ապրիլի
                           14 ին 19:15 – իր տանը

Ծանր քամիների ոռնոցի ներքո թագադիր –
նորօրյա Դոֆինը նաիրյան`
հույսն ու ապավենը ցեղի մարտնչող –
դավադիր գնդակից խոցված – մեռած է. չկա...

Քո թագադրմամբ
մեր արքայական արյան կորուսյալ արժանապատվությունն էր
դարձել ետ –
դեպի հոգիներս մրափող, խուլ, անհաղորդ,
դեպի սրտերս կասկածից ժանգոտվող...
Արկերի որոտի ներքո՝
մի որոտընդոստ արթնացմամբ ցեղի արյան,
մեր անհանգիստ Սահմանին Արևելյան,
և ողջ նաիրյան ցեղի համար –
ընդունեցիր պսակը փառքի, մաքառման, զոհի –
արյունլվա ցեղի վրա կրկին "Ողորմեան" ծավալելու...
Եվ արդ,
պատուհասների օրինաչափությամբ մի անխափան –
պատառոտված կրծքով –
կրկին հավերժանում է փառքը
արդեն որերորդ դոֆինի նաիրական, -
ու մի պոետ,
որ անարցունք ու բիրտ էր ց արդ,
սրտով կարծր էր ու համառ էր հավատի մեջ –
դարերի կարգին հնազանդ
ողբն է վավերում ի լուր
և ի հեճուկս...